Patitiah

Pasan Mamak ka Kamanakan

Nan kanduang kamanakanmamak
Buah hati ayah jo bundo
Dek kamanakan cubolah simak
Dangakan mamak bacurito 
  Kok indak salah mamak mahituang
Di agak agak sampai kini
Takalo kamanakan ka dibaduang
Mamak maliek partamo sakali
Ditanggal samo bulan nan samo
Sakian tahun maso dulu
Dihituang sampai kiniko
Indak taraso wakatu balalu
Dihari baiak bulan nan baiakko
Tanggal kalahiran kamanakan
Mamak tulih gurindam ka ganti kado
Pitih tak mungkin mamak kirimkan
Mamak bukanlah urang kayo
Cadiak indak pandaipun bukan
Hanyo sabagai tandonyo cinto
Apo nan ado nan mamak barikan
Sapanjang sara’ nan mangato
Di adapt ka mamak pakaikan
Kok senteang bilai di bundo
Kok kurang ayah ka mancukuikkan
Diri mamak kok dipandangi
Bukan maratok manyasa untuang
Banang sahalai umpamo tali
Putuih kamanakan nan ka manyambuang
Walaupun mamak tanaman joloang
Didalam suku tanaman tuo
Tapi umpamo karambie condoang
Ka parak urang jatuah buahnyo
Lah kariang tanah manggadangkan

Lah latieh manyiram pagi patang
Hutang pupuak alun talansaikan
Buah lah dulu di ansua urang
Nan labieh cameh dalam hati
Tantu kamanakan lah tau juo
Mamak indak baranak padusi
Baranak jantan surang pulo

Si upiak si buyuang sinan
Nan gadang nan ketek iyo
Kok etek ka ditanyokan
Panghulu indak ba datuak tido

Tapi samantangpun ba itu
Bialah mamak jo untuangnyo
Tigo bulan dikanduang ibu
Suratanlah sudah jo garih nyo
Indak doh mamak bimbang jo ragu
Sakarek indak ba hati sumbiang
Kok barek bana baban di pangku
Nan kamanakan ka mamak bimbiang
Mamak jambokan sapanjang tangan
Mamak uluakan sapanjang tali
Ba itu adat ma ajakan

Walau lah banyak nan lupo kini
Katukuak tambah dari mamak
Indak malabihi dari ayah
Dek kamanakan cubolah simak
Mamak ka muloi basajarah
Takalo maso dahulunyo
Sabalun barabalun
Alun baputiek jo babungo
Alun babatang jo badaunNiat tasimpan dalam hati
Dirunggo dado ayah jo bundo

Taruko baru ka jadi
Baru sajo mangaka bijo
Ayah badoa pado nan Kuaso
Mandeh bakandak pado Illahi
Kok layie anak nan dicito
Kapangganti badan diri
Diwarih nan ka bajawek
Dipusako nan ka batoloang
Indak dibilang jarieh jo panek
Lamo jomaso indak dihetoang

Kok layie anak laki laki
Umpamo ameh jo parmato
Ibarat cincin di jari
Ka panyonsoang tamu kok tibo
Ka tungkek pamanih jalan
Ka karih pamaga adat
Panjago warih katurunan
Ka pambela dunie akhirat
Kok nyampang layie anak padusi
Ibarat bungo di halaman
Hiasan dalam nagari
Sumarak anjuang paranginan
Barakat doa jo pintak
Masonyo Allah ka mambari
Balaku juo kironyo pintak
Sambilan bulan sapuluah hari
Layielah anak parampuan
Sahari layie sahari banamo

Namo indak ka mamak sabuikkan
Tapi baa manggadangkannyo
Sajak muloi turun mandi
Sampai pandai jalan surang
Anak pamenan patang pagi
Bak cando intan bakarang
Dijujuang bagai makuto
Hiasan dalam kampuang
Ditanai bagai gumalo
Ka jadi sumarak anjuang
Di asuah sikola jo mangaji
Di aja adat sopan santun
Dari sahari ka sahari
Sampai babilang tahun
Dibalikan subang jo galang
Dipakaikan ameh balampih
Dari ketek dinanti gadang
Sampai manjadi anak gadih
Kok dipandang kapado umua
Kinilah masuak tujuah baleh
Dari dapua sumua jo kasua
Kamanakan lah patuik tau jo kameh
Kamanakan mamak gadih nan jombang
Sumarak anjuang paranginan
Limpapeh rumah nan gadang
Baitu di Minang rang himbaukan
Manuruik adat di Minangkabau

Sara’ mangato adat mamakai
Sajak tamat mangaji di surau
Umua cukuik bilangan lah sampai
Lah pandai batanak jo manggulai
Lah tau jo padeh asin garam
Lah kameh manyapu lantai 
Dari lua sampai ka dalam
Umpamo tanaman dalam parak
Batang gadang daunlah rimbun
Buah lah mangka saparo masak 
Mangarang bungo bak antimun
Siriehlah patuik naiak junjuang

Hutang di mandeh ayah jo bundo
Disiko carito mamak kuduang
Isuak disambuang ka tukuaknyo
Banyak contoh ka mamak sabuikkan
Ka jadi suri gadih Minang
Adat jo sara’ ma ajakan
Minggu di muko ka mamak kambang
Sampaikan salam ka ayah jo bundo
Doakan mamak talakik pulang
Bakumpua kito di hari rayo
Karik jo kabiah samo di jalang..
sumber:Oleh Yan Majo Basa, dari Palanta R@ntauNet Related ArticlesIf you enjoyed this article just click here, or subscribe to receive more great content just like it.Subscribe via RSS Feed Your information will not be shared. Ever. Comments 3 Comments« Prev PostNext Post »Home

Blog Archive

 Blog Archive October (11) September (13) August (9) July (15) June (14) May (12) April (20) March (25) February (21) January (20) December (13) November (15) October (22) September (11) August (9) July (15) June (15) May (5) April (12) March (10) February (10) January (13) December (7) November (10) October (14) September (13) August (10) July (1) June (2) May (1) April (8) March (9) February (5) 

Popular Posts

Batu Akik "LUMUIK" Sungai Dareh Yang Tersohor ( Kab. Dharmasraya )Batu permata atau batu akik merupakan suatu bentuk batu dari hasil proses kristalisasi dari beberapa mineral yang tersimpan di dalam ...Pidato Pasambahan Siriah CaranoGunuang nago di pauah limo Nampak nan dari kampus Unand Jaweklah salam dari ambo walau indak bajabaik tangan A...Angku Saliah - Orang Keramat dari PariamanJika Anda berkunjung ke rumah makan Padang atau tempat-tempat tertentu yang milik hubunganya dengan Padang. Mungkin saja Anda sering me...Terowongan Air Bawah Tanah PLTA Danau Singkarak Terpanjang di IndonesiaDanau Singkarak tak cuma identik  dengan ikannya yang langka yaitu ikan bilih. Sumber daya ikan-ikannya telah memberikan kehidupan ...Ragam Rumah Adat MinangkabauIstano Daulat Dipertuan Bagindo Sultan Istano Tuan Rajo Malenggang Istano Tuanku Rajo Bagindo Rumah Gadang Balenggek (Tuan Gadang)...Koleksi Batu Akik "LUMUIK" Sungai DarehKeindahan Batu Lumut (Sungai Dareh) di Kabupaten Dharmasraya semakin banyak peminatnya, karena batu lumut ini mempunyai kharisma yang ting... Support : Your Link | Your Link | Your LinkCopyright © 2013. Info Minang - All Rights ReservedTemplate Created by Creating Website Published by Mas TemplateProudly powered by Blogger